Ni Liv: 20 år – Jubileumskonsert

Ni Liv: 20 år – Jubileumskonsert
Laurdag 12. august 2023
Gullbring Amfi, kl. 19:30
365,- / 555,-

Ni Liv er eit americana-band frå Bø og Midt-Telemark med tekstar på norsk. Musikken speglar heile bandets kollektive basseng av musikalske idéar og krumspring. Ni Liv har sidan starten i 2003 spela over 400 konsertar rundt i Noreg og gjeve ut 7 studioalbum, 2 ep-ar og ei konsertplate. Plata «Langhelg» frå 2011 blei nominert til Spelemannspris i countryklassa. Bandet har vore lista på P1s spelelister heile 11 gonger. Låtar som «Håkken e du», «Det var den gong», «Kastanjehår», «Merkeband», «Gruble i kor» og «Ikkje spør» blir framleis jamnleg spela på norgeskanalen og andre riksdekkande radiostasjonar.

Mykje av den musikalske inspirasjonen er henta frå bandmedlemmenes største heltar: Old Crow Medicine Show, Paul Simon, The Rolling Stones, Bruce Molsky, The Band, Steve Earle og Dolly Parton. Tekstane gjev eit usminka blikk på livet og tida me lever i. Ni Liv skriv og komponerer, arrangerer og produserer all musikken sin sjølv, og spelar inn låtane live i studio. Det skal vera ekte og energisk!

I 2023 feirar Ni Liv 20 år på vegen med ein eigen jubileumskonsert som seg hør og bør med musikalske gjestar på heimebane på Telemarkfestivalen.

Obs! Få med deg heile konsertkvelden i amfiet – kjøp Heilaften-billett!